საქართველოს უზენაესი სასამართლო
უზენაესი სასამართლოს თავმჯდომარე კახეთის რეგიონის მოსამართლეებს შეხვდა
გამოქვეყნებულია: 15/06/2015
2015 წლის 12-13 ივნისს უზენაესი სასამართლოს თავმჯდომარე ნინო გვენეტაძე მართლმსაჯულების რეფორმის მესამე ეტაპის ფარგლებში დაგეგმილ საკანონმდებლო ცვლილებებთან დაკავშირებით კახეთის რეგიონის მოსამართლეებს შეხვდა.
ნინო გვენეტაძემ შეხვედრის მონაწილეებს წარმოუდგინა მოხსენება „საერთო სასამართლოების შესახებ“ საქართველოს ორგანულ კანონში შესატანი ცვლილებების შესახებ.
განხილვის თემა გახლდათ ასევე საქართველოს კანონებში: „საქართველოს საერთო სასამართლოების მოსამართლეთა დისციპლინური პასუხისმგებლობისა და დისციპლინური სამართალწარმოების შესახებ“, „საქართველოს იუსტიციის უმაღლესი სკოლის შესახებ“, „უზენაეს სასამართლოში საკასაციო საჩივრის დასაშვებობის კრიტერიუმების შესახებ“ შესატანი ცვლილებები.
კანონპროექტების შესახებ მოხსენებების წარმოდგენის შემდეგ გაიმართა დისკუსია, სადაც მოსამართლეებმა წარმოადგინეს საკუთარი მოსაზრებები და ასევე, გამოთქვეს კმაყოფილება, რომ ცვლილებათა პაკეტის პარლამენტში განხილვამდე მოსამართლეთა კორპუსში მოხდა მასზე მსჯელობა.
შეხვედრის ინიციატორია საქართველოს უზენაესი სასამართლო. შეხვედრა გაიმართა ევროპის საბჭოს პროექტი „მართლმსაჯულების სისტემის დამოუკიდებლობისა და ეფექტიანობის გაძლიერება საქართველოში“ მხარდაჭერით.