საქართველოს უზენაესი სასამართლო

საქართველოს უზენაესი სასამართლოს პლენუმის სხდომა

გამოქვეყნებულია: 07/05/2015

7 მაისს საქართველოს უზენაეს სასამართლოში შედგა პლენუმის სხდომა.

სხდომაზე რამდენიმე საკითხზე მიიღეს გადაწყვეტილება, კერძოდ, 2 წლიანი უფლებამოსილების ვადით არჩეული იქნა საკვალიფიკაციო პალატა შემდეგი შემადგენლობით: ზურაბ ძლიერიშვილი - პალატის თავმჯდომარე, ნინო ბაქაქური და ნუგზარ სხირტლაძე - პალატის წევრები. „საერთო სასამართლოების შესახებ“ საქართველოს ორგანული კანონის მე-19 პრიმა მუხლის თანახმად, უზენაესი სასამართლოს საკვალიფიკაციო პალატა განიხილავს საჩივრებს მოსამართლის თანამდებობაზე უვადოდ გამწესებაზე უარის თქმის შესახებ იუსტიციის უმაღლესი საბჭოს გადაწყვეტილებებზე.

პლენუმის გადაწყვეტილებით უზენაესი სასამართლოს თავმჯდომარე ნინო გვენეტაძე არჩეული იქნა სისხლის სამართლის საქმეთა პალატის თავმჯდომარედ .

ასევე, დამტკიცდა სამეცნიერო - საკონსულტაციო საბჭოს დებულება, რომელიც არის კანონის საფუძველზე შექმნილი უზენაესი სასამართლოს სათათბირო ორგანო და მოწოდებულია პრაქტიკოსი იურისტებისა და სამართლის მეცნიერების მონაწილეობით შეიმუშაოს და გამოაქვეყნოს რეკომენდაციები სამართლისა და სასამართლო პრაქტიკის აქტუალურ საკითხებზე.