საქართველოს უზენაესი სასამართლო

უზენაესი სასამართლოს თავმჯდომარის ვიზიტი საერთაშორისო კონფერენციაზე

გამოქვეყნებულია: 07/04/2014

2014 წლის 6-8 აპრილს  ნორვეგიის დედაქალაქ ოსლოში გაიმართება  საერთაშორისო კონფერენცია თემაზე „ევროპის ადამიანის უფლებათა სასამართლოს გრძელვადიანი პერსპექტივები“. კონფერენციის მუშაობაში მონაწილეობენ საქართველოს უზენაესი სასამართლოს თავმჯდომარე კონსტანტინე კუბლაშვილი და თბილისის სააპელაციო სასამართლოს მოსამართლე ირაკლი შენგელია.

კონფერენცია,რომელიც ევროსაბჭოს ეგიდით იმართება,მრავალსეგმენტიანია.

კონფერენციაზე განიხილება,როგორც ქვეყნებს შორის თანამშრომლობის გაღრმავების საკითხები,ასევე სამომავლო საქმიანობის  გეგმების დასახვა ადამიანის უფლებათა დაცვის სფეროში. 

კონფერენციის დღის წესრიგით გათვალისწინებულია ისეთი საკითხების განხილვა,როგორიცაა ადამიანის უფლებათა ევროპული სასამართლოს უახლესი გამოწვევები, რეფორმები და წარმატებები. ევროპული სასამართლოს საქმიანობას ადგილობრივი და საერთაშორისო ექსპერტები შეაფასებენ. კონფერენციის ფარგლებში ევროპის ადამიანის უფლებათა სასამართლოსა და ეროვნული სასამართლოების წარმომადგენლებს შორის დიალოგი გაიმართება.

კონფერენციის მონაწილეები ისაუბრებენ ადამიანის უფლებათა ევროპული სასამართლოს ანგარიშვალდებულებასა და უფლებამოსილებაზე, ასევე ეროვნული სასამართლოების მიერ გადაწყვეტილებების აღსრულების  მნიშვნელობაზე.

კონფერენციის მუშაობაში მონაწილეობენ: მოსამართლეები, მეცნიერები,ექსპერტები,სამთავრობო და არასამთავრობო სექტორის  წარმომადგენლები.