საქართველოს უზენაესი სასამართლო
უზენაესმა სასამართლომ მსჯავრდებულს სასჯელი შეუმცირა და გაათავისუფლა
გამოქვეყნებულია: 27/03/2014
2014 წლის 26 მარტს უზენაესი სასამართლოს სისხლის სამართლის საქმეთა პალატამ მსჯავრდებულ ხ. ზ-ს საკასაციო საჩივარი ნაწილობრივ დააკმაყოფილა და მსჯავრდებულის ქმედება საქართველოს სსკ-ის 19,160-ე მუხლის მე-2 ნაწილის ,,ა“ ქვეპუნქტიდან იმავე კოდექსის 150-ე მუხლის 1-ლ ნაწილზე გადააკვალიფიცირა.
ქუთაისის საქალაქო და სააპელაციო სასამართლოების მიერ მსჯავრდებული ხ. ზ. ცნობილ იქნა დამნაშავედ ბინაში მფლობელის ნების საწინააღმდეგოდ შესვლის მცდელობისათვის, რომელიც არღვევს ბინის ხელშეუხებლობას, ჩადენილი ძალადობის მუქარით. უზენაესმა სასამართლომ მიიჩნია, რომ პირველი და სააპელაციო სასამართლოების მიერ მსჯავრდებულის ქმედებას არასწორი სამართლებრივი შეფასება მიეცა, რის გამოც ამ უკანასკნელის დანაშაული გადაკვალიფიცირდა იძულებაზე (ადამიანისათვის ქმედების თავისუფლების უკანონო შეზღუდვა, ე.ი. ფსიქიკური იძულება, შეასრულოს მოქმედება, რომლის განხორციელება ან რომლისგან თავის შეკავება მის უფლებას წარმოადგენს, ანდა საკუთარ თავზე განიცადოს თავისი ნება-სურვილის საწინააღმდეგო ზემოქმედება), ამასთან, მსჯავრდებულს თავისუფლების აღკვეთა 1 წლამდე შეუმცირდა და იგი გათავისუფლდა სასჯელაღსრულების დაწესებულებიდან.