საქართველოს უზენაესი სასამართლო
უზენაესი სასამართლოს გამამართლებელი გადაწყვეტილება
გამოქვეყნებულია: 26/12/2013
2013 წლის 25 დეკემბერს უზენაესი სასამართლოს სისხლის სამართლის საქმეთა პალატამ მსჯავრდებულების - ზაზა და დავით მ-ების მიმართ ქუთაისის სააპელაციო სასამართლოს გადაწყვეტილება შეცვალა, კერძოდ: ზაზა მ. წარდგენილ ბრალდებაში უდანაშაულოდ ცნო, ხოლო დავით მ-ს მიმართ დანაშაულის კვალიფიკაცია შეცვალა და დანიშნული სასჯელი შეუმცირა.
საქმის მასალების თანახმად, დავით მ-ს ბრალი ედებოდა დამამძიმებელ გარემოებებში ჩადენილი განზრახ მკვლელობისთვის, ხოლო ზაზა მ-ს - დანაშაულის დაფარვაში.
საკასაციო პალატამ საქმეში არსებულ მტკიცებულებათა ერთობლიობით დადასტურებულად მიიჩნია, რომ მსჯავრდებულ დავით მ-ს მხრიდან ადგილი არ ჰქონია განზრახ მოქმედებას და მან გაუფრთხილებლობით მოუსპო სიცოცხლე მერაბ ა-ს.
რაც შეეხება მსჯავრდებულ ზაზა მ-ს, იგი გამართლდა მისთვის შერაცხულ ბრალდებაში, რომელიც დანაშაულის დაფარვას ითვალისწინებს, კერძოდ, საქართველოს სისხლის სამართლის კოდექსი გაუფრთხილებლობით სიცოცხლის მოსპობის დაფარვას დანაშაულად არ მიიჩნევს.
შესაბამისად, უზენაესმა სასამართლომ ზაზა მ. უდანაშაულოდ მიიჩნია 375-ე მუხლით გათვალისწინებული დანაშაულის ჩადენაში და იგი სასამართლო სხდომის დარბაზიდან გაათავისუფლა, ხოლო დავით მ. დამნაშავედ ცნო 116-ე მუხლის 1-ლი ნაწილით გათვალისწინებული დანაშაულის ჩადენაში და სასჯელის სახედ და ზომად განუსაზღვრა 4 წლით თავისუფლების აღკვეთა, რაც „ამნისტიის შესახებ“ საქართველოს კანონის შესაბამისად შეუმცირა ერთი მეოთხედით და საბოლოო სასჯელად განუსაზღვრა 3 წლით თავისუფლების აღკვეთა.