საქართველოს უზენაესი სასამართლო

ნინო გვენეტაძემ იან კელი მიიღო

გამოქვეყნებულია: 22/11/2017

2017 წლის 22 ნოემბერს, საქართველოს უზენაესი სასამართლოსა და იუსტიციის უმაღლესი საბჭოს თავმჯდომარემ ნინო გვენეტაძემ შეხვედრა გამართა ამერიკის შეერთებული შტატების საგანგებო და სრულუფლებიან ელჩთან იან კელისთან. შეხვედრაზე ნინო გვენეტაძემ ისაუბრა მართლმსაჯულების რეფორმის მესამე ტალღის ფარგლებში, საერთო სასამართლოების სისტემაში განხორციელებულ ცვლილებებზე, მათ შორის საქმეთა ელექტრონული განაწილების წესის დანერგვასთან, დამოუკიდებელი ინსპექტორის სამსახურის ამოქმედებასთან და მოსამართლეთა თანამდებობაზე უვადოდ გამწესებასთან დაკავშირებით.

უზენაესი სასამართლოს თავმჯდომარემ მადლობა გადაუხადა ელჩს ამერიკის სახელმწიფო დეპარტამენტისა და ამერიკის საერთაშორისო განვითარების სააგენტოს პროექტების ფარგლებში გაწეული დახმარებისთვის, რაც სასამართლო სისტემის 2017-2021 წლების სტრატეგიის წარმატებით განხორციელებას ემსახურება. თავის მხრივ, ამერიკის შეერთებული შტატების  ელჩმა მხარდაჭერა გამოუცხადა სასამართლო რეფორმის მიმდინარეობის პროცესს, რაც მიზნად ისახავს სასამართლო სისტემის ანგარიშვალდებულების და საზოგადოების ნდობის ამაღლებას.