საქართველოს უზენაესი სასამართლო
ხელვაჩაურის რაიონული სასამართლოს განახლებული შენობა ოფიციალურად გაიხსნა
გამოქვეყნებულია: 01/10/2016
2016 წლის პირველ ოქტომბერს ხელვაჩაურის რაიონული სასამართლოს განახლებული შენობა ოფიციალურად გაიხსნა.
გახსნის ცერემონიალს ესწრებოდნენ: უზენაესი სასამართლოსა და იუსტიციის უმაღლესი საბჭოს თავმჯდომარე, ნინო გვენეტაძე; იუსტიციის უმაღლესი საბჭოს მდივანი, ლევან მურუსიძე; სსიპ საერთო სასამართლოების დეპარტამენტის თავმჯდომარე, შოთა ქარჩავა, აგრეთვე, სასამართლოს, ადგილობრივი თვითმმართველობისა და მედიის წარმომადგენლები.
ხელვაჩაურის რაიონული სასამართლოს შენობის სარეაბილიტაციო სამუშაოები 3 თვის მანძილზე მიმდინარეობდა და ერთ-ერთი ყველაზე მასშტაბური პროექტია, რომელიც მიმდინარე წელს განახორციელა სსიპ საერთო სასამართლოების დეპარტამენტმა. კერძოდ, პროექტი ითვალისწინებდა შემდეგი სახის სამუშაოების ჩატარებას: სახურავისა და შენობის ფასადის კაპიტალურ შეკეთებას; სარინელის, წყალგადამყვანი და სადრენაჟო სისტემის მოწყობას, რითაც აღმოიფხვრა უხვი ნალექის დროს (რაც დამახასიათებელია ადგილობრივი კლიმატისთვის) სასამართლოს ეზოში წყლის დაგროვების პრობლემა. შენობის პირველი სართული სრულყოფილად ადაპტირდა შეზღუდული შესაძლებლობების მქონე პირთათვის. გამწვანდა და კეთილმოეწყო სასამართლოს მიმდებარე ტერიტორია, ასევე დამონტაჟდა გარე განათება.
ნინო გვენეტაძემ დაათვალიერა სასამართლოს შენობისა და მიმდებარე ტერიტორიის განახლებული ინფრასტრუქურა, ასევე მოინახულა სხდომის დარბაზები, მოსამართლეთა და აპარატის თანამშრომელთა სამუშაო ოთახები, რომლებიც აღიჭურვა თანამედროვე ტექნიკითა და ინვენტარით.
ხელვაჩაურის გაერთიანებული რაიონული სასამართლო ამოქმედდა 2009 წლის 10 სექტემბრიდან და მისი სამოქმედო ტერიტორია განისაზღვრება ხელვაჩაურის, ქედის, შუახევისა და ხულოს მუნიციპალიტეტების ადმინისტრაციული საზღვრებით.