საქართველოს უზენაესი სასამართლო
უზენაეს სასამართლოში არასრულწლოვანთა მართლმსაჯულების კოდექსის პრაქტიკაში დანერგვასთან დაკავშირებული ხარვეზების თაობაზე სამუშაო შეხვედრა გაიმართა
გამოქვეყნებულია: 23/03/2016
2016 წლის 23 მარტს უზენაეს სასამართლოში გაეროს ბავშვთა ფონდის (UNICEF) ორგანიზებითა და უზენაესი სასამართლოს მხარდაჭერით არასრულწლოვანთა მართლმსაჯულების კოდექსის პრაქტიკაში დანერგვასთან დაკავშირებული ხარვეზების თაობაზე სამუშაო შეხვედრა გაიმართა. შეხვედრას ხელმძღვანელობდა უზენაესი სასამართლოსა და იუსტიციის უმაღლესი საბჭოს თავმჯდომარე, ქ-ნ ნინო გვენეტაძე და მასში მონაწილეობას იღებდნენ სოციალური მომსახურების სააგენტოს, პრობაციის ეროვნული სააგენტოს, იურიდიული დახმარების სამსახურის, შინაგან საქმეთა სამინისტროს, პროკურატურისა და იუსტიციის სამინისტროს წარმომადგენლები. შეხვედრას, ასევე ესწრებოდნენ შესაბამისი სპეციალიზაციის მქონე მოსამართლეები და დარგის სხვა სპეციალისტები.
შეხვედრაზე მონაწილეებმა მიმოიხილეს არასრულწლოვანთა მართლმსაჯულების კოდექსის პრაქტიკაში დანერგვასთან დაკავშირებული პრობლემატიკა, მათ შორის, იმსჯელეს სოციალური მუშაკების, როგორც არასრულწლოვანთა წარმომადგენლების, ჩართვის აუცილებლობაზე სასამართლო პროცესის დროს. არსებული პრაქტიკის გათვალისწინებით, პრობლემას წარმოადგენს სოციალურ მუშაკთა ვიწრო სპეციალიზაციის არ ქონა არასრულწლოვანთა მართლმსაჯულების სფეროში.
შეხვედრის ფარგლებში პრობაციის სააგენტოს წარმომადგენლებმა წარმოადგინეს არასრულწლოვნებთან მიმართებით წინასასამართლო მოკვლევის ანგარიში.
შეხვედრა წარიმართა აქტიური დიალოგისა და აზრთა გაცვლის რეჟიმში, მონაწილეებმა გამოკვეთეს არასრულწლოვანთა მართლმსაჯულების კოდექსის პრაქტიკაში დანერგვასთან დაკავშირებული ხარვეზები და იმსჯელეს მათი გამოსწორების გზებზე.